อคฺคมคฺคสมงฺคี ทุกฺขาย เวทนาย โส ตโต อวิชฺชานุสยํ ปริชานาติ, โน จ โส ตโต กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ภวราคานุสยญฺจ ปริชานาติฯ สฺเวว ปุคฺคโล กามธาตุยา ทฺวีสุ เวทนาสุ โส ตโต อวิชฺชานุสยญฺจ มานานุสยญฺจ ปริชานาติ, โน จ โส ตโต กามราคานุสยญฺจ ปฏิฆานุสยญฺจ ทิฏฺฐานุสยญฺจ วิจิกิจฺฉานุสยญฺจ ภวราคานุสยญฺจ ปริชานาติฯ สฺเวว ปุคฺคโล รูปธาตุยา อรูปธาตุยา โส ตโต อวิชฺชานุสยญฺจ มานานุสยญฺจ ภวราคานุสยญฺจ ปริชานาติ, โน จ โส ตโต กามราคานุสยญฺจ ปฏิฆานุสยญฺจ ทิฏฺฐานุสยญฺจ วิจิกิจฺฉานุสยญฺจ ปริชานาติฯ (ฉกฺกมูลกํ)
ปริญฺญาวาเร อนุโลมํฯ
4. ปริญฺญาวาร
(ฆ) ปฏิโลมปุคฺคโล
[231] (ก) โย กามราคานุสยํ น ปริชานาติ โส ปฏิฆานุสยํ น ปริชานาตีติ? อามนฺตาฯ
(ข) โย วา ปน ปฏิฆานุสยํ น ปริชานาติ โส กามราคานุสยํ น ปริชานาตีติ? อามนฺตาฯ
(ก) โย กามราคานุสยํ น ปริชานาติ โส มานานุสยํ น ปริชานาตีติ?
อคฺคมคฺคสมงฺคี กามราคานุสยํ น ปริชานาติ, โน จ โส มานานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา กามราคานุสยญฺจ น ปริชานนฺติ มานานุสยญฺจ น ปริชานนฺติฯ
(ข) โย วา ปน มานานุสยํ น ปริชานาติ โส กามราคานุสยํ น ปริชานาตีติ?
อนาคามิมคฺคสมงฺคี มานานุสยํ น ปริชานาติ, โน จ โส กามราคานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา มานานุสยญฺจ น ปริชานนฺติ กามราคานุสยญฺจ น ปริชานนฺติฯ
โย กามราคานุสยํ น ปริชานาติ โส ทิฏฺฐานุสยํ…เป.… วิจิกิจฺฉานุสยํ น ปริชานาตีติ?
อฏฺฐมโก กามราคานุสยํ น ปริชานาติ, โน จ โส วิจิกิจฺฉานุสยํ น ปริชานาติฯ อนาคามิมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา กามราคานุสยญฺจ น ปริชานนฺติ วิจิกิจฺฉานุสยญฺจ น ปริชานนฺติฯ
โย วา ปน วิจิกิจฺฉานุสยํ น ปริชานาติ โส กามราคานุสยํ น ปริชานาตีติ?
อนาคามิมคฺคสมงฺคี วิจิกิจฺฉานุสยํ น ปริชานาติ, โน จ โส กามราคานุสยํ น ปริชานาติฯ อนาคามิมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ กามราคานุสยญฺจ น ปริชานนฺติฯ
โย กามราคานุสยํ น ปริชานาติ โส ภวราคานุสยํ…เป.… อวิชฺชานุสยํ น ปริชานาตีติ?
อคฺคมคฺคสมงฺคี กามราคานุสยํ น ปริชานาติ, โน จ โส อวิชฺชานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา กามราคานุสยญฺจ น ปริชานนฺติ อวิชฺชานุสยญฺจ น ปริชานนฺติฯ
โย วา ปน อวิชฺชานุสยํ น ปริชานาติ โส กามราคานุสยํ น ปริชานาตีติ?
อนาคามิมคฺคสมงฺคี อวิชฺชานุสยํ น ปริชานาติ, โน จ โส กามราคานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา อวิชฺชานุสยญฺจ น ปริชานนฺติ กามราคานุสยญฺจ น ปริชานนฺติฯ
[232] (ก) โย ปฏิฆานุสยํ น ปริชานาติ โส มานานุสยํ น ปริชานาตีติ?
อคฺคมคฺคสมงฺคี ปฏิฆานุสยํ น ปริชานาติ, โน จ โส มานานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา ปฏิฆานุสยญฺจ น ปริชานนฺติ มานานุสยญฺจ น ปริชานนฺติฯ
(ข) โย วา ปน มานานุสยํ น ปริชานาติ โส ปฏิฆานุสยํ น ปริชานาตีติ?
อนาคามิมคฺคสมงฺคี มานานุสยํ น ปริชานาติ, โน จ โส ปฏิฆานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา มานานุสยญฺจ น ปริชานนฺติ ปฏิฆานุสยญฺจ น ปริชานนฺติฯ
โย ปฏิฆานุสยํ น ปริชานาติ โส ทิฏฺฐานุสยํ…เป.… วิจิกิจฺฉานุสยํ น ปริชานาตีติ?
อฏฺฐมโก ปฏิฆานุสยํ น ปริชานาติ, โน จ โส วิจิกิจฺฉานุสยํ น ปริชานาติฯ อนาคามิมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา ปฏิฆานุสยญฺจ น ปริชานนฺติ วิจิกิจฺฉานุสยญฺจ น ปริชานนฺติฯ
โย วา ปน วิจิกิจฺฉานุสยํ น ปริชานาติ โส ปฏิฆานุสยํ น ปริชานาตีติ?
อนาคามิมคฺคสมงฺคี วิจิกิจฺฉานุสยํ น ปริชานาติ, โน จ โส ปฏิฆานุสยํ น ปริชานาติฯ อนาคามิมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ ปฏิฆานุสยญฺจ น ปริชานนฺติฯ
โย ปฏิฆานุสยํ น ปริชานาติ โส ภวราคานุสยํ…เป.… อวิชฺชานุสยํ น ปริชานาตีติ?
อคฺคมคฺคสมงฺคี ปฏิฆานุสยํ น ปริชานาติ, โน จ โส อวิชฺชานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา ปฏิฆานุสยญฺจ น ปริชานนฺติ อวิชฺชานุสยญฺจ น ปริชานนฺติฯ
โย วา ปน อวิชฺชานุสยํ น ปริชานาติ โส ปฏิฆานุสยํ น ปริชานาตีติ?
อนาคามิมคฺคสมงฺคี อวิชฺชานุสยํ น ปริชานาติ, โน จ โส ปฏิฆานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา อวิชฺชานุสยญฺจ น ปริชานนฺติ ปฏิฆานุสยญฺจ น ปริชานนฺติฯ
[233] โย มานานุสยํ น ปริชานาติ โส ทิฏฺฐานุสยํ…เป.… วิจิกิจฺฉานุสยํ น ปริชานาตีติ?
อฏฺฐมโก มานานุสยํ น ปริชานาติ, โน จ โส วิจิกิจฺฉานุสยํ น ปริชานาติฯ อคฺคมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา มานานุสยญฺจ น ปริชานนฺติ วิจิกิจฺฉานุสยญฺจ น ปริชานนฺติฯ
โย วา ปน วิจิกิจฺฉานุสยํ น ปริชานาติ โส มานานุสยํ น ปริชานาตีติ?
อคฺคมคฺคสมงฺคี วิจิกิจฺฉานุสยํ น ปริชานาติ, โน จ โส มานานุสยํ น ปริชานาติฯ อคฺคมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ มานานุสยญฺจ น ปริชานนฺติฯ
โย มานานุสยํ น ปริชานาติ โส ภวราคานุสยํ…เป.… อวิชฺชานุสยํ น ปริชานาตีติ? อามนฺตาฯ
โย วา ปน อวิชฺชานุสยํ น ปริชานาติ โส มานานุสยํ น ปริชานาตีติ? อามนฺตาฯ
[234] (ก) โย ทิฏฺฐานุสยํ น ปริชานาติ โส วิจิกิจฺฉานุสยํ น ปริชานาตีติ? อามนฺตาฯ
(ข) โย วา ปน วิจิกิจฺฉานุสยํ น ปริชานาติ โส ทิฏฺฐานุสยํ น ปริชานาตีติ? อามนฺตา …เป.…ฯ
[235] โย วิจิกิจฺฉานุสยํ น ปริชานาติ โส ภวราคานุสยํ…เป.… อวิชฺชานุสยํ น ปริชานาตีติ?
อคฺคมคฺคสมงฺคี วิจิกิจฺฉานุสยํ น ปริชานาติ, โน จ โส อวิชฺชานุสยํ น ปริชานาติฯ อคฺคมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ อวิชฺชานุสยญฺจ น ปริชานนฺติฯ
โย วา ปน อวิชฺชานุสยํ น ปริชานาติ โส วิจิกิจฺฉานุสยํ น ปริชานาตีติ?
อฏฺฐมโก อวิชฺชานุสยํ น ปริชานาติ, โน จ โส วิจิกิจฺฉานุสยํ น ปริชานาติฯ อคฺคมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา อวิชฺชานุสยญฺจ น ปริชานนฺติ วิจิกิจฺฉานุสยญฺจ น ปริชานนฺติฯ
[236] (ก) โย ภวราคานุสยํ น ปริชานาติ โส อวิชฺชานุสยํ น ปริชานาตีติ? อามนฺตาฯ
(ข) โย วา ปน อวิชฺชานุสยํ น ปริชานาติ โส ภวราคานุสยํ น ปริชานาตีติ? อามนฺตาฯ (เอกมูลกํ)
[237] (ก) โย กามราคานุสยญฺจ ปฏิฆานุสยญฺจ น ปริชานาติ โส มานานุสยํ น ปริชานาตีติ?
อคฺคมคฺคสมงฺคี กามราคานุสยญฺจ ปฏิฆานุสยญฺจ น ปริชานาติ, โน จ โส มานานุสยํ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา กามราคานุสยญฺจ ปฏิฆานุสยญฺจ น ปริชานนฺติ มานานุสยญฺจ น ปริชานนฺติฯ
(ข) โย วา ปน มานานุสยํ น ปริชานาติ โส กามราคานุสยญฺจ ปฏิฆานุสยญฺจ น ปริชานาตีติ?
อนาคามิมคฺคสมงฺคี มานานุสยํ น ปริชานาติ, โน จ โส กามราคานุสยญฺจ ปฏิฆานุสยญฺจ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา มานานุสยญฺจ น ปริชานนฺติ กามราคานุสยญฺจ ปฏิฆานุสยญฺจ น ปริชานนฺติฯ
โย กามราคานุสยญฺจ ปฏิฆานุสยญฺจ น ปริชานาติ โส ทิฏฺฐานุสยํ…เป.… วิจิกิจฺฉานุสยํ น ปริชานาตีติ?
อฏฺฐมโก กามราคานุสยญฺจ ปฏิฆานุสยญฺจ น ปริชานาติ, โน จ โส วิจิกิจฺฉานุสยํ น ปริชานาติฯ อนาคามิมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา กามราคานุสยญฺจ ปฏิฆานุสยญฺจ น ปริชานนฺติ วิจิกิจฺฉานุสยญฺจ น ปริชานนฺติฯ
โย วา ปน วิจิกิจฺฉานุสยํ น ปริชานาติ โส กามราคานุสยญฺจ ปฏิฆานุสยญฺจ น ปริชานาตีติ?
อนาคามิมคฺคสมงฺคี วิจิกิจฺฉานุสยํ น ปริชานาติ, โน จ โส กามราคานุสยญฺจ ปฏิฆานุสยญฺจ น ปริชานาติฯ อนาคามิมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ กามราคานุสยญฺจ ปฏิฆานุสยญฺจ น ปริชานนฺติฯ
โย กามราคานุสยญฺจ ปฏิฆานุสยญฺจ น ปริชานาติ โส ภวราคานุสยํ…เป.… อวิชฺชานุสยํ น ปริชานาตีติ?
อคฺคมคฺคสมงฺคี กามราคานุสยญฺจ ปฏิฆานุสยญฺจ น ปริชานาติ, โน จ โส อวิชฺชานุสยํ น ปริชานาติฯ
ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา กามราคานุสยญฺจ ปฏิฆานุสยญฺจ น ปริชานนฺติ อวิชฺชานุสยญฺจ น ปริชานนฺติฯ
โย วา ปน อวิชฺชานุสยํ น ปริชานาติ โส กามราคานุสยญฺจ ปฏิฆานุสยญฺจ น ปริชานาตีติ?
อนาคามิมคฺคสมงฺคี อวิชฺชานุสยํ น ปริชานาติ, โน จ โส กามราคานุสยญฺจ ปฏิฆานุสยญฺจ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา อวิชฺชานุสยญฺจ น ปริชานนฺติ กามราคานุสยญฺจ ปฏิฆานุสยญฺจ น ปริชานนฺติฯ (ทุกมูลกํ)
[238] โย กามราคานุสยญฺจ ปฏิฆานุสยญฺจ มานานุสยญฺจ น ปริชานาติ โส ทิฏฺฐานุสยํ…เป.… วิจิกิจฺฉานุสยํ น ปริชานาตีติ?
อฏฺฐมโก กามราคานุสยญฺจ ปฏิฆานุสยญฺจ มานานุสยญฺจ น ปริชานาติ, โน จ โส วิจิกิจฺฉานุสยํ น ปริชานาติฯ ทฺวินฺนํ มคฺคสมงฺคีนญฺจ อฏฺฐมกญฺจ ฐเปตฺวา อวเสสา ปุคฺคลา กามราคานุสยญฺจ ปฏิฆานุสยญฺจ มานานุสยญฺจ น ปริชานนฺติ วิจิกิจฺฉานุสยญฺจ น ปริชานนฺติฯ
โย วา ปน วิจิกิจฺฉานุสยํ น ปริชานาติ โส กามราคานุสยญฺจ ปฏิฆานุสยญฺจ มานานุสยญฺจ น ปริชานาตีติ?
อนาคามิมคฺคสมงฺคี วิจิกิจฺฉานุสยญฺจ มานานุสยญฺจ น ปริชานาติ, โน จ โส กามราคานุสยญฺจ ปฏิฆานุสยญฺจ น ปริชานาติฯ อคฺคมคฺคสมงฺคี วิจิกิจฺฉานุสยญฺจ กามราคานุสยญฺจ ปฏิฆานุสยญฺจ น ปริชานาติ, โน จ โส มานานุสยํ น ปริชานาติฯ ทฺวินฺนํ มคฺคสมงฺคีนญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ กามราคานุสยญฺจ ปฏิฆานุสยญฺจ มานานุสยญฺจ น ปริชานนฺติฯ
โย กามราคานุสยญฺจ ปฏิฆานุสยญฺจ มานานุสยญฺจ น ปริชานาติ โส ภวราคานุสยํ…เป.… อวิชฺชานุสยํ น ปริชานาตีติ? อามนฺตาฯ
โย วา ปน อวิชฺชานุสยํ น ปริชานาติ โส กามราคานุสยญฺจ ปฏิฆานุสยญฺจ มานานุสยญฺจ น ปริชานาตีติ?
อนาคามิมคฺคสมงฺคี อวิชฺชานุสยญฺจ มานานุสยญฺจ น ปริชานาติ, โน จ โส กามราคานุสยญฺจ ปฏิฆานุสยญฺจ น ปริชานาติฯ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา อวิชฺชานุสยญฺจ น ปริชานนฺติ กามราคานุสยญฺจ ปฏิฆานุสยญฺจ มานานุสยญฺจ น ปริชานนฺติฯ (ติกมูลกํ)
[239] (ก) โย กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ น ปริชานาติ โส วิจิกิจฺฉานุสยํ น ปริชานาตีติ? อามนฺตาฯ
(ข) โย วา ปน วิจิกิจฺฉานุสยํ น ปริชานาติ โส กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ น ปริชานาตีติ?
อนาคามิมคฺคสมงฺคี วิจิกิจฺฉานุสยญฺจ มานานุสยญฺจ ทิฏฺฐานุสยญฺจ น ปริชานาติ, โน จ โส กามราคานุสยญฺจ ปฏิฆานุสยญฺจ น ปริชานาติฯ อคฺคมคฺคสมงฺคี วิจิกิจฺฉานุสยญฺจ กามราคานุสยญฺจ ปฏิฆานุสยญฺจ ทิฏฺฐานุสยญฺจ น ปริชานาติ, โน จ โส มานานุสยํ น ปริชานาติฯ ทฺวินฺนํ มคฺคสมงฺคีนญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ น ปริชานนฺติ …เป.…ฯ (จตุกฺกมูลกํ)
[240] โย กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ น ปริชานาติ โส ภวราคานุสยํ…เป.… อวิชฺชานุสยํ น ปริชานาตีติ? อามนฺตาฯ
โย วา ปน อวิชฺชานุสยํ น ปริชานาติ โส กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ น ปริชานาตีติ?
อฏฺฐมโก อวิชฺชานุสยญฺจ กามราคานุสยญฺจ ปฏิฆานุสยญฺจ มานานุสยญฺจ น ปริชานาติ, โน จ โส ทิฏฺฐานุสยญฺจ วิจิกิจฺฉานุสยญฺจ น ปริชานาติฯ อนาคามิมคฺคสมงฺคี อวิชฺชานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ น ปริชานาติ, โน จ โส กามราคานุสยญฺจ ปฏิฆานุสยญฺจ น ปริชานาติฯ ทฺวินฺนํ มคฺคสมงฺคีนญฺจ อฏฺฐมกญฺจ ฐเปตฺวา อวเสสา ปุคฺคลา อวิชฺชานุสยญฺจ น ปริชานนฺติ กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ น ปริชานนฺติฯ (ปญฺจกมูลกํ)
[241] (ก) โย กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ภวราคานุสยญฺจ น ปริชานาติ โส อวิชฺชานุสยํ น ปริชานาตีติ? อามนฺตาฯ
(ข) โย วา ปน อวิชฺชานุสยํ น ปริชานาติ โส กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ภวราคานุสยญฺจ น ปริชานาตีติ?
อฏฺฐมโก อวิชฺชานุสยญฺจ กามราคานุสยญฺจ ปฏิฆานุสยญฺจ มานานุสยญฺจ ภวราคานุสยญฺจ น ปริชานาติ, โน จ โส ทิฏฺฐานุสยญฺจ วิจิกิจฺฉานุสยญฺจ น ปริชานาติฯ อนาคามิมคฺคสมงฺคี อวิชฺชานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ภวราคานุสยญฺจ น ปริชานาติ, โน จ โส กามราคานุสยญฺจ ปฏิฆานุสยญฺจ น ปริชานาติฯ
ทฺวินฺนํ มคฺคสมงฺคีนญฺจ อฏฺฐมกญฺจ ฐเปตฺวา อวเสสา ปุคฺคลา อวิชฺชานุสยญฺจ น ปริชานนฺติ กามราคานุสยญฺจ ปฏิฆานุสยญฺจ มานานุสยญฺจ ทิฏฺฐานุสยญฺจ วิจิกิจฺฉานุสยญฺจ ภวราคานุสยญฺจ น ปริชานนฺติฯ (ฉกฺกมูลกํ)
(ง) ปฏิโลมโอกาโส
[242] (ก) ยโต กามราคานุสยํ น ปริชานาติ ตโต ปฏิฆานุสยํ น ปริชานาตีติ?
ทุกฺขาย เวทนาย ตโต กามราคานุสยํ น ปริชานาติ, โน จ ตโต ปฏิฆานุสยํ น ปริชานาติฯ รูปธาตุยา อรูปธาตุยา อปริยาปนฺเน ตโต กามราคานุสยญฺจ น ปริชานาติ ปฏิฆานุสยญฺจ น ปริชานาติฯ
(ข) ยโต วา ปน ปฏิฆานุสยํ น ปริชานาติ ตโต กามราคานุสยํ น ปริชานาตีติ?
กามธาตุยา ทฺวีสุ เวทนาสุ ตโต ปฏิฆานุสยํ น ปริชานาติ, โน จ ตโต กามราคานุสยํ น ปริชานาติฯ รูปธาตุยา อรูปธาตุยา อปริยาปนฺเน ตโต ปฏิฆานุสยญฺจ น ปริชานาติ กามราคานุสยญฺจ น ปริชานาติฯ
(ก) ยโต กามราคานุสยํ น ปริชานาติ ตโต มานานุสยํ น ปริชานาตีติ?
รูปธาตุยา อรูปธาตุยา ตโต กามราคานุสยํ น ปริชานาติ, โน จ ตโต มานานุสยํ น ปริชานาติฯ ทุกฺขาย เวทนาย อปริยาปนฺเน ตโต กามราคานุสยญฺจ น ปริชานาติ มานานุสยญฺจ น ปริชานาติฯ
(ข) ยโต วา ปน มานานุสยํ น ปริชานาติ ตโต กามราคานุสยํ น ปริชานาตีติ? อามนฺตาฯ
ยโต กามราคานุสยํ น ปริชานาติ ตโต ทิฏฺฐานุสยํ…เป.… วิจิกิจฺฉานุสยํ น ปริชานาตีติ?
ทุกฺขาย เวทนาย รูปธาตุยา อรูปธาตุยา ตโต กามราคานุสยํ น ปริชานาติ, โน จ ตโต วิจิกิจฺฉานุสยํ น ปริชานาติฯ อปริยาปนฺเน ตโต กามราคานุสยญฺจ น ปริชานาติ วิจิกิจฺฉานุสยญฺจ น ปริชานาติฯ
ยโต วา ปน วิจิกิจฺฉานุสยํ น ปริชานาติ ตโต กามราคานุสยํ น ปริชานาตีติ? อามนฺตาฯ
(ก) ยโต กามราคานุสยํ น ปริชานาติ ตโต ภวราคานุสยํ น ปริชานาตีติ?